តាកែវ៖ ភិក្ខុមួយអង្គគង់នៅ វត្តទ្រព្យគរ ឃុំត្រញាំងសាប ស្រុកបាទី ខេត្តតាកែវ នួន ឆានី ដែលបួសជាសង្ឃតែមានចិត្តសាហាវព្រៃផ្សៃត្រូវបានសាលាអនុគណស្រុកបាទី ខេត្តតាកែវ ចាប់ផ្សឹកបញ្ជូនទៅឱ្យសមត្ថកិច្ចចាត់ការតាមនីតិវិធីច្បាប់ហើយ បន្ទាប់ពីបានវាយលើសាមណេរមួយអង្គបែកព្រះកេស (ក្បាល) ហូរឈាមដូចគេចាក់កាលពីថ្ងៃទី២៥ ខែមករា ឆ្នាំ២០២៣។
សាលាគណខេត្តតាកែវបានឱ្យដឹងថា ភិក្ខុ នួន ឆានី ដែលមានអាយុ ៣២ឆ្នាំ បានប្រើចានវាយលើព្រះកេសសមណេរពិតប្រាកដមែន កាលពីថ្ងៃទី២៥ ខែមករា ឆ្នាំ២០២៣ ម្សិលមិញ ស្ថិតនៅវត្តទ្រព្យគរ ឃុំត្រញាំងសាប ស្រុកបាទី ខេត្តតាកែវ។
ទោះជាយ៉ាងគេនៅមិនទាន់ដឹងពីមូលហេតុដែលនាំឱ្យមានការវាយលើសាមណេរនេះនៅឡើយទេ។
សាលាគណខេត្តតាកែវបញ្ជាក់ថា៖ «សាលាអនុគណស្រុកបាទី បានផ្សឹកភិក្ខុរូបនោះរួចរាល់ហើយ និងបានប្រគល់ជូនសមត្ថកិច្ចមូលដ្ឋានដោះស្រាយតាមនីតិវិធីច្បាប់បន្ត»។
ការចាប់ផ្សឹកនិងបញ្ជូនទៅឱ្យសមត្ថកិច្ចមានវិធានការនេះគឺបន្ទាប់ពីមានការផ្សាយថាភិក្ខុ នួន ឆានី បានប្រើប្រាស់ហិង្សា និងមានរូបភាពជាច្រើនសន្លឹកពីសភាពនៃរបួសដែលរយះព្រះកេសយ៉ាងវែងមើលទៅទំនងជាមុតជាមួយចាន នាំឱ្យមហាជនថ្កោលទោសជាខ្លាំងដោយសារហិង្សានេះត្រូវបានប្រព្រឹត្តិដោយបុគ្គលនៅក្នុងស្បង់៕
